moy

MOY. s. m. de tout genre. Pronom de la premiere personne. Il faut remarquer que ce pronom n'est proprement qu'une variation du pronom le, dans les cas obliques; c'est pourquoy il ne se met jamais immediatement devant un verbe pour le regir. Ainsi on ne dit point, moy fais, moy dis, mais, je fais, je dis. Comme il y a pourtant plusieurs occasions où il sert de nominatif, nous en rapporterons icy quelques-unes, & nous marquerons aussi en passant les differentes variations, & les differents emplois qu'il a dans les autres cas, nous reservant à faire de plus particulieres observations là dessus dans le Traité de la Grammaire. Moy je vous soustiens que. je vous soustiens moy que. je vous asseure moi qui vous parle. moy dont il a recherché l'amitié. moy pour qui il a temoigné &c. moy, trahir le meilleur de mes amis! faire une lascheté, moy! qui le dit, c'est moy qui vous en réponds. qui fut bien aise, ce fut moy. vous & moy nous sçavons bien. il n'y aura personne que moy. personne que moy ne le sçaura. je m'y rendray, moy deuxiesme. moy ne songeant à rien, j'allay luy dire.

Ce pronom fait au genitif De moy; mais ce genitif n'est presque point en usage: car on ne dit point, La maison de moy, le livre de moy; mais alors au lieu du pronom personnel on se sert du pronom possessif, & on dit, ma maison, mon livre. Cependant lors que quelque autre genitif precede, on peut fort bien mettre aussi de moy à la suite, au genitif. Ce que je vous dis là est le sentiment de mon frere & de moy. c'est l'avantage de tous les deux, aussi bien de luy que de moy.

Il fait au datif, Moy, à moy, & me; mais non pas en telle sorte qu'on puisse se servir également de toutes ces trois manieres; car par exemple, Moy, au datif ne se dit qu'avec la seconde personne de l'imperatif des verbes actifs, & avec le verbe neutre Parler; & il se met tousjours aprés le verbe. Donnez-moy cela. donnez le moy. parlez-moy de cela tantost. Il ne se dit mesme quelquefois que par redondance, & pour donner plus de force à ce qu'on dit; ce qui n'a toutefois d'usage que dans le discours familier. Faites-moy taire ces gens-là. donnez leur moy sur les oreilles.

A Moy, se joint avec tous les temps des verbes, excepté la remarque cy-dessus; & hors de cette remarque c'est le seul datif dont on se sert quand le verbe precede. Il est mesme tellement propre aux verbes neutres passifs, aux verbes actifs employez avec les autres pronoms personnels, au verbe Estre, lors qu'il signifie Appartenir, au verbe Avoir, lors qu'il est joint aux noms substantifs, Affaire, Rapport, Relation, & quelques autres semblables, au verbe Tenir, lors qu'il est mis à l'impersonnel, à quelques verbes neutres, comme Songer, Penser, & enfin aux verbes actifs qui se construisent inseparablement avec un substantif, comme Prendre garde; que dans tous ces verbes là il ne peut jamais estre varié par moy ny me. Cela s'adresse à moy. il s'est confié à moy. il s'est donné à moy. il s'attaque à moy. cela est à moy. vous aurez affaire à moy. il tient à moy. il ne tient qu'à moy d'aller là. songez à moy. pensez-vous à moy? prenez garde à moy.

Il s'employe mesme aprés la seconde personne de l'imperatif des verbes purement actifs, lors que quelque autre datif precede. Faites ce plaisir là à mon frere & à moy. donnez-luy vostre ressentiment & à moy aussi.

A moy, Joint avec un subst. signifie, Qui est à moy, qui m'appartient. C'est un laquais à moy. un habit à moy. une lettre à moy. il a de l'argent à moy, des papiers à moy.

A moy, Se prend aussi dans la signification de vers moy; & alors ce n'est plus un datif. Marchez à moy. venez à moy.

De vous a moy. Façon de parler dont on se sert pour témoigner à quelqu'un qu'on luy parle selon ses veritables sentiments, mais qu'il ne faut pas redire ce qu'on luy dit. De vous à moy c'est un pauvre homme, c'est un homme qui ne merite pas l'opinion qu'on a de luy. de vous à moy, je ne croy pas que la chose réussisse.

Quant a moy. Façon de parler dont on se sert par energie, & pour donner plus de force & d'emphase à ce qu'on dit. Vous en direz ce qu'il vous plaira, quant à moy je sçay bien ce qui en est.

On dit prov. & fig. Se mettre sur son quant à moy, pour dire, S'en faire accroire, faire l'entendu.

Pour moy, par moy, selon moy, sur moy, & les autres façons de parler où ce pronom est employé, pourront se voir chacune aux prepositions ou particules ausquelles il se joint.

Dictionnaire de l'Académie française . 1964.